Lilja Cardew er fjölhæf myndlistarkona og myndhöfundur og hefur bæði kennt, starfað við og sýnt sjónlistir og teikningu þrátt fyrir ungan aldur. Hún hefur tekið þátt í nokkrum samsýningum með málverk; akrýl, vatnsliti, blek og blandaða tækni, en einnig videóverk með frumsaminni tónlist. 

Í júní 2022 vann Lilja fyrstu verðlaun í árlegri hönnunarkeppni, Penguin Cover Design Award, með bókakápu sinni Diary of a Young Naturalist eftir Dara McAnulty. Höfundur bókarinn skrifaði þetta um bókakápu Lilju: „Lilja‘s design has stunningly embodied the core of Diary, by elevating what we see every day. The angle, which I have positioned myself in for most of my childhood watching insects and listening to every sound, is perfectly captured here. There‘s a special order about the design that really appeals to me, the lines have a wild logical sequence. I love it!“

Lilja hefur sterka tengingu við náttúruöflin og segir sjálf að það komi skýrast fram í því hvernig hún taki eftir smáatriðunum í umhverfi sínu, eða eins og hún segir sjálf: „Að alast upp á Íslandi, þar sem hrá orka náttúrunnar minnir stöðugt á sig, bæði í stórkostlegri fegurð og í ýktu veðurfari, hefur markað mig sem myndlistarkonu, því ég er ávallt meðvituð um litlu stundirnar sem dagar okkar byggjast á.“