Sigríður Aðalsteinsdóttir lauk 8. stigi frá Söngskólanum í Reykjavík 1994 og burtfararprófi frá sama skóla 1995. Aðalkennari hennar við skólann var Elísabet F. Eiríksdóttir. Haustið 1995 hóf hún nám í óperudeild Tónlistarskólans í Vínarborg og ári síðar hóf hún nám við óperudeild Tónlistarháskólans í Vínarborg þaðan sem hún lauk námi árið 2000 með hæstu einkunn. Sigríður lauk kennaranámi til kennsluréttinda frá KÍ 2004 og meistarnámi í stjórnun frá HÍ 2013. Sigríður hefur starfað sem söngkennari frá árinu 2002 bæði á Akureyri og í Reykjavík.
Sigríður hóf söngferil sinn í Þjóðaróperunni í Vínarborg árið 1997 þá enn við nám í tónlistarháskólanum. Hún var síðan lausráðin einsöngvari við Þjóðaróperuna til ársins 2002. Hún söng ýmis hlutverk við húsið, m.a. þriðju dömu í Töfraflautunni, Fjodor í Boris Godunow og Mercedes í Carmen. Á Íslandi hefur hún sungið hlutverk Zitu í Gianni Schicci með Norðurópi,  þriðju dömu í Töfraflautunni, Marcellinu í Brúðkaupi Fígarós, Mother Goose í Rake’s Progress og Lolu í Cavalleria Rusticana og ýmis hlutverk í Óperuperlum hjá Íslensku óperunni. Hún hefur haldið fjölda ljóðatónleika og komið fram sem einsöngvari með ýmsum kórum og hljómsveitum, m.a. Sinfóníuhljómsveit Norðurlands, Sinfóníuhljómsveit Íslands og Sinfóníuhlómsveit unga fólksins.