Victorine Pasman er hollensk sviðslistakona sem skapar heillandi gjörninga og grípandi búninga þar sem hreyfing, húmor og samspil við áhorfendur gegna lykilhlutverki. Hún fæst meðal annars við götuleikhús í margra metra háum kjólum og sýningar þar sem stórbrotnir búningar fljóta á vatni. Sýningar hennar hafa heillað áhorfendur með leikandi léttleika þar sem þeim er boðið inn í undraverðan heim. Úr verður spennandi upplifun sem varpar nýju ljósi á hversdagsleikann og fangar hugann. Hugmyndir hennar lifna við í samstarfi við annað sviðslistafólk, dansara og tónlistarfólk, í almannarými, úti í náttúrunni og meðal áhorfenda. Sýningarnar fara fram á söfnum, á leiklistar- og listahátíðum og á ýmsum menningarviðburðum.

Verk hennar hafa verið sýnd á stórum hátíðum og menningarviðburðum í Hollandi, meðal annars á Lowlands, Oerol, Solar Weekend Festival, Boekenbal, Gergiev Festival og tískuvikunni í Amsterdam. Á alþjóðlegum sýningarferli sínum hefur Victorine meðal annars unnið í Odegand í Gent í Belgíu, við götuleikhúshátíðina Olala í Lienz í Austurríki, Music for Sunset á Ítalíu, Festival de Musique du Périgord Noir í Frakklandi og Musikfestspiele Sanssouci í Potsdam í Þýskalandi.