Fljótandi dívan

Er hún draumsýn, villuráfandi vofa eða sírena sem rís úr djúpinu?

Tignarleg sópransöngkona svífur á vatninu í risavöxnum kjól úr regnhlífum og syngur gullfallegar aríur. Tveir dularfullir vatnaþjónar leiða hana hægt áfram á meðan söngurinn berst til áhorfenda.

Fljótandi dívan er töfrandi tónlistar- og sjónarspil eftir hollensku listakonuna Victorine Pasman, sem á bæði hugmyndina og búningahönnunina. Verkið sækir innblástur í 17. aldar klæðnað, hollenskt landslag og sögur af hafmeyjum og skipbrotnum konum – einhvers staðar á mörkum óperu, myndlistar og draums.

Þegar rökkvar lýsist búningurinn upp og dívan verður að flöktandi, svífandi ljósveru.